JM, LAUREN, AT ENRIQUE, MGA BAGONG BIDA NG ”MULA SA PUSO”
Sina JM De Guzman, Lauren Young, at Enrique Gil ang napili sa lead roles ng inaabangang remake ng phenomenal hit teleseryeng ”Mula sa Puso” sa ABS-CBN.
Bibigyang buhay nga ng tatlo ang mga papel nina Gabriel, Via, at Michael na unang ginampanan nina Diether Ocampo, Claudine Barretto, at yumaong aktor na si Rico Yan sa orihinal na bersyon ng serye na ipinalabas noong 1997.
”Masaya, kabado, excited, and blessed. Gagampanan ko dito ang role ni Sir Rico Yan and alam ng lahat kung gaano kabigat ang role na yun,” sabi ng theater/indie actor na si JM na gaganap sa kanyang unang lead role sa telebisyon.
”Nung una masaya lang ako na may work uli ako pero di ko pa alam noon what shoes I have to fill. After I found out kung gaano pala kalakas ng impact ng show, dun na ko kinabahan,” bahagi naman ni Enrique na gaganap din bilang leading man sa unang pagkakataon.
Pinaghalong saya at kaba din ang nararamdaman ni Lauren lalo pa’t ito na ang pinakahihintay niyang launching niya bilang ganap na leading lady. Nang tanungin si Lauren sa ginanap NA pictorial at promo shoot ng “Mula sa Puso” kung nainip ba siya sa paghihintay ng kanyang big break sa showbiz, magaan sa loob na sinabi ng dalaga na hindi.
“Hindi naman ako nainip. If they give me something, then good. If they don’t give me something, then they might not want me lang. But at least they are giving me something now. Whatever comes into my life I’ll accept it,” paliwanag ni Lauren
Ngayon pa lamang ay sinisimulan na ang tatlo ng intriga tulad ng pagkukumpara sa kanila kina Rico, Claudine, at Diether.
“Hindi naman maiiwasan yun. People will always compare us to the original one which adds up more pressure. But then again if there is no pressure, it’s not worth it. You always need that pressure to give you that push,” sabi ni Lauren.
Hindi rin kaila sa publiko ang namuong magandang pagtitinginan sa pagitan ni Rico at Claudine habang ginagawa ang serye, kaya naman agad na tinanong ng ilang press si JM kung posible ba siyang main-love din kay Lauren.
“Bakit naman hindi? Maganda naman si Lauren, mabait, talented. Bakit hindi,” sagot ni JM.
Si JM ay unang napanood sa Precious Hearts Romances series na “Midnight Phantom” na agad sinundan ng supporting role sa PHR series din na “Alyna” at “Kristine.” Si Enrique naman ay natunghayan sa “Pieta,” “George and Cecil,” “Shoutout” at “ASAP XV” bilang isa sa miyembro ng Gigger Boys.
Samantala, si Lauren, bilang homegrown talent ng Star Magic, ay napanood na sa napakaraming mga TV shows sa Dos tulad ng “Lobo,” “Your Song presents Underage,” “Dahil May Isang Ikaw,” at “Juanita Banana.” Gumanap na rin siya makailang ulit sa drama anthology na “MMK” at napanood sa mga pelikulang tulad ng ”Sayo Lamang” ng Star Cinema.
Kasama rin sa cast si Dawn Zulueta bilang Magda, Eula Valdez bilang Selina, Ariel Rivera bilang Don Fernando, DJ Durano bilang Ysmael, Tyrone Perez bilang Gilbert, Paul Salas bilang Warren at Sue Anna Ramirez bilang Nicole.
Abangan ang pagbabalik ng “Mula sa Puso” sa direksyon pa rin ni Wenn V. Deramas, malapit na malapit na sa ABS-CBN.
